Danin lea, vel eambbo go ovdal, veara ohcat dan mii buktá doaivvu, juoga bistevaš, juoga dehálaš, gávdnat dan, mii addá čuovgasa.
Mun jáhkán ahte čovdosa gávnnat Juovllaid Sánis. Ipmil boahtá vuolás min máilbmái, Ipmil lea dáppe min luhtte, Ipmil dahká iežas raššin, šaddá mánážin ja riegáda doppe gos mii olbmot ássat.
Dalle stálljas, kruppás, go sutnuide ii lean idjasadji. Keaisár gáibidii ahte buohkat galge čálihuvvot olmmošlohkui, oažžut olmmošlogu vai sáhttá vearu bearrat ja fidnet bajilgova. Son lei dego eanáš diktáhtorat iige beroštan jos muhtin lei geafi dahje áhpeheapmi. Das, dan áiggis ja báikkis, doppe gos dál lea Palestina Oarjegáddi, riegáda Ipmila bárdni. Ja dasto maŋŋelis, vuolggahuvvo dat unna bearaš báhtarussii – Egyptii. Go gonagas Herodes balaha ja áigu sorbmet buot guovllu gándamánážiid.
Juovlaevaŋgelium muitala midjiide čiekŋalis duohtavuođa: Ipmil lea dáppe min máilmmis, eandalit vuollegas diliin, doppe gos leat gatnjalat. Ja dat dahká ge juovlaevangeliuma čuovgasin. Ii dat čiega vuoigatmeahttunvuođaid, váttisvuođaid, vuostegieđageavvamiid dahje morrašiid, das gal gávdno čiekŋalis duohtavuohta máilmmi dilis, olbmuid gaskavuođain. Muhto dás – dán rašes ráfehis máilmmis gávdno Ipmil, gávdno stuorát fápmu go mii, guhte háliida bissut ovttas minguin, ja vádjolit min guora, gii lea min luhtte, gii lea ráhkisvuohta ja čujuha áiggis viidát ovddosguvlui.
Dat lea juovlaevangeliuma čuovgadas. Rašesvuođas, vuolimuččas, Ipmil badjána ja muitala ahte mii maid gullat mielde, ja gohčču min ráhkistit lagamuččamet.
Muhto dalle ferte váibmu litnat, váibmu galgá rabastuvvot.
Juovlaevangeliuma loahpas čuožžu ahte Márjá vurkkodii buot mii celkojuvvui ja guorahalai dan váimmustis. Son rabai váimmus.
Dáid juovllaid lea dát mu sátni didjiide ja munnje alccesan:
Raba váimmut
Raba iežat earáide
Raba iežat sutnje gii gillá
Raba iežat dutnje alccesat
Raba iežat lundui, elliide ja buot dasa mii eallá
Raba iežat árgabeaivvi ipmašiidda, daid buori áššiide
Raba iežat lagaš olbmuide
Raba iežat bassivuhtii, Ipmilii
Raba iežat čiegusvuođaide
Ii fal álelassii ja olles áiggi. Muhto raba iežat.
Divtte váimmu litnat. Ipmil lea dáppe dán máilmmis, Váldde sáni vuostái, čáhkke saji Ipmilii. Váldde máilmmi vuostái. Váibmui.
Jos it nagot rahpat váimmut, go eat mii álo dan nagot, de muitte ahte dat stuorra váibmu, Ipmila váibmu, lea dutnje rahppojuvvon, du eallimii, du morrašii, du illui ja du vuoittahallamiidda. Beroškeahttá. Go mii oskut ahte Ipmil lea dás, min eallimiin, máilmmi eallimis. Maiddái vuolimuččas.
Gudni lehkos Ipmilii vuollegasas!
Stig Lægdene
Davvi-Hålogalándda bismá