– Vi synest kyrkja vår er så vakker, og ho skjuler mange kulturhistoriske skattar og spennande forteljingar. Plasseringa – midt i Leikong-bygda og tett ved riksvegen – gjer det enkelt å stoppe. Vi håpar mange vil ta turen, anten dei er turistar eller lokale som ønskjer å lære meir om kyrkja si unike historie, seier leiar i soknerådet Monika Haanes Waagan.
Måndag til fredag 11 - 15
Kyrkja er open frå måndag til fredag kl. 11.00–15.00. Frivillige vil vere til stades for å ta imot gjestar, svare på spørsmål og tilby enkel omvising. Dette er også eit tilbod for dei som berre vil setje seg ned for ei stille stund, oppleve stemninga i kyrkjerommet eller tenne eit lys i lysfatet.
Det vert òg høve til å kjøpe seg ein kopp kaffi og ein nysteikt vaffel – og slå av ein hyggeleg prat med dei som er til stades.
Mykje folk ikkje veit om kyrkja
– Kyrkja er ei åttekanta trekyrkje. Ho vart opphavleg bygd på Sjøholt i 1807, og kom til Leikong i 1872, fortel Waagan. – Kyrkja er i vanleg bruk gjennom heile året, men det er likevel mykje folk ikkje veit om kyrkja, som at den gamle inngangsdøra og preikestolen med dei sju dydane faktisk er frå 1600-talet. Det er ei stor glede å få dele alt dette med dei som kjem innom i sommar.
Foto: Max Ingar Mørk