«Aellede bïllh!»(Meeht 28,5)
Nyjsenæjjah gïeh gåaroes kroepten gåajkoe böötin, govlin: «Aellede bïllh!» Nyjsenæjjah bïlleminie gosse dam bïevnesem govlin.
Daelie luhkiegovhte jaepieh vaaseme mænngan manne påaskide Taiwanesne heevehtim.
Mannem bööreme dahkoe båetedh håalodh juktie Taiwanen protestantihke åålmegi lij stoere jubileume.
Luste saerniem åålmegi bïjre govledh. Åålmegh stuerebe jïh stuerebe sjïdteme. Dej lin gellie skuvlh jïh skïemtjegåetieh, jïh misjonærh lin raajeme gellie giefies laantide.
Ålvas jïjnjh almetjh tjåanghkenamme stoere juelkietjenkere-sæjjan gyrhkesjidh voestes påske-biejjien. Manne edtjim påaske-biejjiej bijpeleteeksten bïjre håalodh jïh eeremasth daaj baakoej bïjre: «Aellede bïllh!» Påaski bïevnese lea: Aellede bïllh!
Dah baakoeh hijven sjïehtin gosse edtjin ovmessie ietnie-gïeline laavlodh «Earoe Åajvan gie jaemedem hååjhteme». Manne hov deejrim Taiwanen almetjh aerkie lin jïh bïlleminie båetijej biejjiej gielhtie.
Bååhperim gosse vööjnim gellie almetjh gïknjeldh tjelmiejgujmie munnjien soptsestin mov håalome dej vaajmojde dïjpeme. Dellie ussjedim, mejtie manne maam joem båajhtode jeahteme gosse dah sïjhtin aavosne heevehtidh? Ijje! Dah sïjhtin mannem gijhtedh juktie manne guarkeme sijjieh aerkie lin jïh bïlleminie. Dah aerkie lin båetijej biejjiej gielhtie. Dej lij aerkiesvoete gosse edtjin jubileumem heevehtidh. Mov gåassoehtæjja badth munnjien soptsesti: «Hijven mijjese dov håalomem govledh. Datne hov guarkeme guktie mijjieh bïlleminie jalhts aavosne libie.» Almetjh deejrin guktie faamohks laanti åvtehkh tsælloeminie jïh man stoere dåaroefoevh dej lin. Daelie gujht sagke vïerrebe Taiwanese jïh jeatjah laantide sjïdteme.
Fïerhti påaski muvhth sijhtieh daejredh mejtie almetjh daejrieh man gielhtie påaskide heevehtibie. Gosse påaskide heevehtibie, dellie mujhtebe guktie Jeesusine sjïdti Jerusalemmese paalme-aejlegen raejeste voestes påaske-biejjien raajan.
Påaskh leah mijjen bïjre aaj. Påaski bïevnese ij ajve vihkeles saernie. Ij ajve saernie man bïjre edtjebe jiermestalledh guktie teologh iktesth jiermestalleme jïh edtjieh jiermestalledh. Jiermestalledh vihkele lea. Man gielhtie jïh man gaavhtan nimhtie sjïdti.
Påaski bïevnese mijjese gïeh aerkie libie, gïeh sorkeminie jïh aavodeminie. Almetjh giejtie Taiwanesne gaavnesjim, mannem dan bïjre ööhpehtin. Idtjin sïjhth mijjieh edtjebe aerkiesvoetem åajaldehtedh gosse påaskide jïh gærhkoe-jubileumem heevehtibie. Dah jis sïjhtin jiehtedh: gosse påaskide heevehtibie, dellie edtjebe aerkiesvoetem jïh asvem mijjen åssjalommesidie luejhtedh jïh jiermestalledh.
Påaski saernie lea saernine vuarhkas almetji åssjalommesi bïjre, almetji biehtemen, stuarehksvoeten bïjre jïh guktie almetjh sinsitnien vööste nåakelaakan dåemiedieh jïh sinsitnem nuerhkieh. Påaski bïevnese soptseste nåakevoeten bïjre jïh buerievoeten bïjre, jaemeden bïjre jïh jieleden bïjre. Påaski bïevnese soptseste aaj man gielhtie maehtebe aavoedidh jalhts bïllebe.
Påaske-bïevnese stööremes lea. Stuerebe goh ov-reaktoe jïh dåaroe, stuerebe goh såårkoe, stuerebe goh jaememe. «Aellede bïllh!»
Jïjnjh almetjh veartanisnie påaskide heevehtieh. Dej jielemh ovmessie leah. Læjhkan laavlobe «Earoe Åajvan gie jaemedem hååjhteme.
«Aellede bïllh!» dïhte jeahta gïese maehtebe leahtadidh gosse ibie guarkah man gielhtie galkebe vaejviedidh jïh gosse ibie maehtieh aavoedidh. «Aellede bïllh!»
Maehtebe Jupmielasse leahtadidh gie mijjese hïegkem vadteme. Jaemiedistie jïh nåakevoeteste veaksahkåbpoe. Ïedtjem vadta guktie maehtebe jaehkedh, håhkesjidh, jieledh jïh iehtsedh.
Daam jaehkebe gosse aejlies maalestahkem byöpmedibie:
«Kristuse jeemi. Kristuse jaemiedistie tjuedtjeli. Kristuse bååstide båata.»
Earoe altasasse gieriesvoeten gielhtie gie veaksakåbpoe jaemiedistie.
Lahkoe påaskh!
Olav Fykse Tveit
Nidarosen domprovstetjïelten bæspa. Bæspatjåanghkoen åvtehke