Máŋgasis mis lea «jahkejuvla» man mielde bargat. Dávjá danin vai sáhttet leat sihkkarat das ahte gártat bargat buot maid galgat. Muhtumiid jahkejuvla lea čatnon bearráigehččui ja revišuvdnii, dahje eará bargorutiidnaidda. Nuppiid jahkejuvla fas lea čatnasan dása goas muohta boahtá ja goas dat fas jávká, nu han lea vissa sihke eanan- ja boazodoalus.
Máŋgasiidda mearkkašit beassážat ollu friddjabeivviid, ja dalle atnet vejolašvuođa leat olgun luonddus.
Girkus lea mis «jahkejuvla» čátnojuvvon stuorra kristtalaš allabasiide. (girkojahki álgá 1. adveantasotnabeaivvi). Dál lahkonit Beassážat ja maŋŋelis bohtet Hellodagat.
Juohke áidna jagi lohkat ja gullat Jesusis guhte Pálbmasotnabeaivvi riide Jerusalemii.
Deaivat muitalusain eahkedaččaid ásaheamis Skilleduorastaga, ja gillámušas mii loahpahuvvo Jesusa jápmimiin Guhkesbearjadaga. Ja de boahtá dat buot stuorámus: 1. beassášbeaivvi sátni das ahte Jesus lea bajásčuožžilan jápmimis.
Beassážat leat girku jahkejuvllas dat buot mávssolaččamus. Jesusa jápmin ja bajásčuožžileapmi lea duohtavuohta mii lea kristtalaš oskku vuođđu. Jos muitalus Jesusa jápmimis ja bajásčuožžileamis ii leat duohta, lea min kristtalaš osku huksejuvvon giellásiid ala.
Dat govviduvvo bures biibbalvearssas dás bajábealde. Lea justa Jesusa bajásčuožžileapmi mii dagaha ahte kristtalaš oskkus lea doaivu, Dát čálabáiki lohkkojuvvo álo go girkus lea gásta, ja lohkko maid dávjá hávdádemiin, maŋŋil muoldda suhppema. Dien láhkai sáhttá cealkit ahte dát biibbalvearsa birastahttá min eallima: dat čuodjá gásttas ja dat čuodjá hávderavddas.
Máilmmis lea dál erenoamáš váttis ja doaivvuhis áigi.
Lea álki arvvahuvvat. Muhtumat mis leat eambbo optimisttalaččat go earát. Muhto leaččat mii dál pessimisttat dahje optimisttat, mii sáhtit oamastit doaivvu. Go kristtalaš doaivu ollá guhkkeliidda go jáhkku buorre ihttábeaivvis. Biehtár, Jesusa apoastal ja kristtalaš girku vuosttaš jođiheaddji čállá ealli doaivvus. Dát doaivu lea čátnojuvvon Jesusa bajásčuožžileapmái. Dát doaivu ollá gitta agálašvuhtii.
Váttis áiggiin dárbbašit doaivvu Mii dárbbašit doaivvu máilmmis gos jođiheaddjit láhttejit vuorddekeahttái ja álggahit sođiid. Mii dárbbašit doaivvu máilmmis gos leat ollu luonddubillisteamit ja dálkkádatroasut mat bohtet ain lagabui min. Gasku váttis áiggiid sáhttit mii bajidit doaivvu, Dát doaivu ii jávkat min ovddasvástádusa buori servvodatássin. Baicce justa nuppe láhkái: dat addá roahkkatvuođa dahkat Jesusa buori daguid doppe gos mii leat, ja seammás eallit doaivvus ja oskkus dasa ahte buorrevuohta lea gievrrat go bahávuohta, danin go Ipmil lea buot fámoleamos.
Mu stuora sávaldahkan dál ovdalis 2025 Beassážiid lea, ahte beassážiid sáhka addášii midjiide sihke doaivvu ja oskku dán máilmmis mii lea nu báidnojuvvon dorvvuhisvuođas ja bahávuođas.
Jesusis lea eallin vuoitán. Halleluja.
Son lei jápmán, gea son eallá Halleluja.
Jápmin poarttaid gaikkoda, Halleluja.
Eallimii min oahpista. Halleluja.
Sálbmagirji II S Tore Johnsen
Olav Øygard
Davvi-Hålogalándda bismagotti bisma