Mu čeabeha birra heaŋgá silbaruossa mii lea kopiija ovtta dain boarráseamos ruossain mii lea gávdnon hávddis dáppe davvin. Muhto kristtalaš osku ollá guhkkelii maŋos áiggis, Jesusii ja Palestiinai 2000 jagi dassái, ja čielga oktavuođain boarestestamenttalaš áigái, máŋga duhát jagi ovdal dan fas. Mii leat oassin dán guhkes historjjálaš oktavuođas, oskkolaččat geat ovttaláhkai dollet guhtet guoimmi gieđas čađa jahkečuđiid.
Kristtalaš osku gávdno miehtá máilmmi. Mis lea oktavuohta oskkolaččaiguin miehtá oppa máilmmi. Mii rohkadallat muhtun seammá rohkosiid, ávvudit eahkedaččaid ja gásttašuvvot čáziin. Ja dat deháleamos: mii oskut bajáščuožžileapmái ja bajásčuožžileami fápmui. Lea máŧohis stuorra oskkolaččaid oktavuohta, oktasaš doaivvuin, geat dál áiddo leat álggaheamen beassášávvudeami, ja mii leat oassin dán oktavuođas.
Kristtalaš osku čatná min sivdnádussii, eatnamii, merrii ja váriide, elliide, šattuide, guliide ja lottiide. Min buohkaid lea seammá Ipmil sivdnidan, nugo Biibbala vuosttaš siiddus muitaluvvo. Mii leat oktiičátnon ja gullat oktii, dan gal dávjá vajáldahttit – muhto dat almmat ge lea das dego vuođđudeaddji beallin dasa mii gullá eallimii. Mii leat sivdnádusat, ja nie gullat oktii.
Mii leat čátnon olbmuide geat bohtet maŋŋil min, geat riegádit boahttevaš buolvvaide. Sii váldet seammá sakrameanttaid go mii ge, sii rohkadallet, ellet ja rahčet dego mii, ja mii leat muhtun láhkái oktiičátnon singuin. Ja go mii rohkadallat sáhttá dat doaibmat dego šaldin sin lusa. Mun rohkadalan áddjuba ovddas gean in leat vel ožžon, mu riikka boahtteáiggi ovddas ja ráfi sidjiide geat bohtet maŋŋil mu.
Kristtalaš osku čatná min áigái maŋŋil go áigi lea nohkan. Mii oskut ja doaivut ahte oktii Ipmila dáhtu ollašuvvá ollásit, boahtá beaivi go vuoiggalašvuohta ja ráhkisvuohta ráđđe, goas Ipmila riika boahtá. Oktii vuoigatmeahttunvuohta, ruhtaváibmilvuohta ja geafivuohta, bahávuohta ja berošmeahttunvuohta nohká. Oktii jápmin jápmá. Dát lea Beassážiid sátni, ja don ja mun, moai letne oassin dán oktavuođas; dál ja dás dego oskkolaččan, doaivvu oamasteaddjin ja oktii – doppe – dan stuorra oktavuođas áiggiid maŋŋá. Mii eat ádde buot dán oktavuođas, almmatge lea dat mearrideaddji, dat fátmmasta min dan stuorámus searvevuhtii, gos dušše ráhkisvuohta ráđđe iige mihkkege eará. Juo dál beassat oainnestit das veahá; go čippostit ja váldit vuostái eahkedismállásiid, go olbmot jođihit vuoiggalašvuođain ja ráhkisvuođain, gos árbmu ja soabahus dáhpáhuvvá.
Leat beassážiid dáhpáhusat mat leat dagahan daid stuorra oktavuođaid. Dat mii dáhpáhuvai Jesusa gillámuša, jápmima ja bajásčuožžileami bokte rabai olbmui oktavuođa dan stuorra oktavuhtii, mii ollá badjel áiggiid, báikkiid ja sajiid, mii lea gievrrat go bahávuohta, bákčasat ja jápmin, mii rihkkui rájáid ja sivdnidii áibba ođđa oktavuođa dutnje ja munnje.
Ilolaš Beassážat!
Stig Lægdene
Davvi-Hålogalandda Bismá