Ungdommane fekk vere med på gameshow med ulike utfordringar, spørsmål og konkurransar knytte til økonomi. Gjennom samarbeid, engasjement og ein god dose konkurranseinstinkt fekk deltakarane utforske økonomi på ein sosial, underhaldande og uformell måte.
Dei fekk og lage budsjett, finne løysingar på ulike økonomiske utfordringar, teste kunnskapen sin gjennom «Fleip eller fakta» og svare på spørsmål som «Kva betyr eigentleg saldo?». Oppgåvene tok utgangspunkt i situasjonar og problemstillingar som ungdom kan møte i sin eigen kvardag.
Målet var å gjere ungdommane meir bevisste på eigne økonomiske val og handlingar, og ved å gi dei kunnskap som kan vere nyttig både no og seinare i livet. Gjennom gameshowet ønskte vi å vise korleis små og store økonomiske avgjerder kan påverke kvardagen, og kor viktig det er å ha oversikt, planleggje og prioritere.
Det blei sjølvsagt også tid til pizza, prat og sosialt fellesskap. Det var viktig å invitere inn til ein møteplass kor ungdom kunne vere saman, engasjere seg og ha det kjekt.
Med god stemning, konkurransar og mykje engasjement fekk vi vist at økonomi slett ikkje treng å vere kjedeleg! Ved å kombinere underhaldning og læring blei økonomi gjort både meir forståeleg, relevant og tilgjengeleg for ungdommane.
Ein stor takk til Fana Sparebank for eit fantastisk samarbeid, eit kreativt og engasjerande opplegg og for at de var med på å gi ungdommane ein lærerik og minnerik kveld!
