Kyrkjevalet: Førebelse tal for valdeltaking

No har 936 av dei lokale valstyra (82 %) stadfesta at dei er ferdig med å rapportere for deltakinga i kyrkjevalet. Oppteljinga så langt viser at kvar tredje veljar har stemt digitalt.

– For første gang var det mogeleg å førehandsstemme digitalt i kyrkjevalet. Det har gjort valet lett tilgjengeleg for folk.

Det seier Ingrid Vad Nilsen som er kyrkjerådsdirektør i Den norske kyrkja.

272 603 stemte i kyrkjevalet

Den førebelse rapporteringa viser at 272 603 stemte i kyrkjevalet, som gjev ei valdeltaking på 8,9 % av alle med stemmerett. Det er ein nedgang frå 2019 då 386 142 stemte (12,6 %).

Kyrkjevalet er det største medlemsdemokratiet i Noreg. Kyrkjerådet har i oppgåve å legge til rette for gjennomføring av valet, medan dei ulike listene og kandidatane har ansvar for å formidle kva dei står for.

– Vår oppgåve er å leggje til rette for kyrkjevalet, og vi har teke eit langt steg med digital førehandsstemming. Det har gjort det enda enklare å stemme. Resultat gjev er nytting informasjon når vi skal evaluere og vidareutvikle kyrkjevalet. Målet er at alle som vil skal få delta i kyrkjevalet.

Flest stemte i val av sokneråd

I kyrkjevalet i Den norske kyrkja skal det veljast medlemmar til sokneråd og bispedømeråd/Kyrkjemøtet. Som tidlegare kyrkjeval er det fleire som stemmer i soknerådsvalet enn i val av bispedømeråd og Kyrkjemøtet.  

254 599 veljarar stemte i val av sokneråd (8,4 %), og i val av bispedømeråd/Kyrkjemøtet stemte 192 158 (6,4 %).

Oversikt per bispedøme

Så langt er Bjørgvin bispedøme er bispedømet med flest veljarar, medan Hamar bispedøme har høgst prosentvis valdeltaking.

Førebelse tal per 14.09.2023 etter 99 % av sokna har lagt inn tal og 82 % har stadfesta at dei er ferdige med rapportering.

Trykk her for å laste ned Excel-fil som viser statistikk for valdeltaking på nasjonalt nivå og per bispedøme.