Dagens bibelord
Apostelgjerningane 3,12–21
Dagens bibelord 04.11.2026
12 Då Peter såg det, tok han til å tala til folket:
«Israelittar! Kvifor undrast de over dette? Kvifor stirer de på oss som om det var vår eiga kraft eller gudsfrykt som gjorde at denne mannen kan gå? 13 Nei, Abrahams og Isaks og Jakobs Gud, våre fedrars Gud, har herleggjort tenaren sin, Jesus. De utleverte han og fornekta han for Pilatus, som hadde sett seg føre å gje han fri. 14 De fornekta Den heilage og rettferdige og bad om å få ein mordar frigjeven. 15 Men opphavsmannen til livet drap de, han som Gud vekte opp frå dei døde; det er vi vitne om. 16 Ved trua på Jesu namn har dette hendt, for det namnet har styrkt denne mannen som de både ser og kjenner. Den tru vi får gjennom dette namnet, gjorde mannen heil og frisk, som de alle kan sjå. 17 Eg veit nok, landsmenn, at de gjorde dette fordi de var uvitande, slik rådsherrane dykkar er. 18 Men slik oppfylte Gud det han på førehand hadde forkynt gjennom alle profetane, at hans salva skulle lida. 19 Angra difor og vend om, så syndene dykkar kan strykast ut. 20 Då skal det koma tider med lindring frå Herren, og han skal senda den Kristus som er bestemt for dykk, Jesus. 21 Han må vera i himmelen til den tid kjem då alt det skal gjenreisast som Gud har tala om frå eldgamle dagar ved munnen til sine heilage profetar.
Kilde: www.bibel.no