Øygarden kyrkjelege fellesråd har ikkje fått kompensasjon for løns- og prisvekst i årets budsjett. Dette inneber ei reell innstramming i rammene for den samla kyrkjelege verksemda, også for drifta av kyrkjegardane. Vi har difor færre fast tilsette og færre sommarvikarar enn tidlegare, og må prioritere hardare enn før.
Dette betyr at graset kan verte høgare enn vanleg før det vert klipt, og at kantklipping rundt gravminne berre vil skje når vi har kapasitet til det. Vi oppmodar difor alle som steller ei grav, til sjølv å klippe litt rundt gravminnet dersom ein har høve til det. Mange gjer dette allereie, og det er eit verdifullt bidrag til fellesskapen.
Vi minner òg om at avfall må sorterast rett. Bioavfall høyrer heime i spann merka med dette, medan plastpotter, lys og restavfall må kastast i eigne behaldarar. Feilsortering skapar ekstraarbeid og kostnader, og belastar ei allereie pressa drift.
På nokre av kyrkjegardane har vi no fått robotklipparar. Desse gjer ein god og effektiv jobb, og vi ber alle om å la dei få gjere arbeidet sitt uhindra.
Til slutt vil vi minne om noko viktig: Det er ikkje kyrkjegardsarbeidarane som bestemmer budsjettrammene. Dei gjer så godt dei kan med dei ressursane dei har. Vis respekt og forståing, og hjelp oss å ta vare på gravplassane våre, slik at dei framleis kan vere gode stader å oppsøke i sorg, minne og takksemd.