Etter eit dødsfall er det vanleg å ta kontakt med eit gravferdsbyrå som hjelper dei pårørande med avskjedsprosessen og ulike praktiske gjeremål og seremonivalg. Me har to lokale byrå: Vest-Telemark Gravferdsbyrå og nystarta Øvre Telemark Begravelsesbyrå. Det er heller ingenting i vegen for å ta hand om ein eller fleire av oppgåvene sjølv.
Ein gravferdseremoni i kyrkja har ein fast struktur med ein del faste rammer. I ein sorgsituasjon kan det vere godt å kvile i at ein slepp å ta stilling til mange ting, men berre kan ta del i ein lang gravferdstradisjon. Samstundes er det høve til å setje eit personleg preg på seremonien t.d. gjennom val av tekstar, salmer og anna musikk. Nokon ynskjer å ha musikkinslag frå vener eller kjende.
Presten avtaler ein sørgjesamtale med dei pårørande. Der er det høve til å snakke om avdøde og sorgprosessen, men og planleggje minneord og andre praktiske ting rundt seremonien.
Om ein har praktiske spørsmål knytt til gravsted og kyrkjegard kan ein ta kontakt med kyrkjeverjen.