I august og september vert det gjennomført totalt ti digitale innspelsmøte. – Vi skulle veldig gjerne vore rundt i landet og møtt folk, men smittesituasjonen gjer at det ikkje er forsvarleg, seier Morten Müller-Nilssen. Han leier hovudutvalet i prosjektet som skal utgreie forslag til ny kyrkjeleg organisering.
Digitalt samspel
– Trass dette har vi funne ei form på desse møta der vi får tilbakemelding på at det er godt samspel mellom oss i studio og dei som fylgjer møtet, seier utvalsleiaren.
Gjennom eit digitalt verktøy kan deltakarar vere med i avstemmingar, lage rangeringar og ordskyer. Oppgåvene som vert gjeve er utarbeidd av dei ulike arbeidsgruppene, som ynskjer svar på ulike problemstillingar, knytt til ny organisering av kyrkja.
Til slutt i møtet kan alle deltakarar stille spørsmål til prosjektleiinga. Det kjem mange gode spørsmål og innspel som møteleiarane ikkje rekk å svare på, difor vil det bli publisert oppsummeringar og svar på ulike spørsmål på kyrkja.no/kirkeligorganisering i tida som kjem.
Oppfordrar til å sende inn innspel
Müller-Nilssen er godt fornøgd med deltakinga så langt, og vonar mange vil vere med å gje sine innspel til prosjektet. – Ein kan sjå dei ulike møta i opptak, men då kan ein ikkje delta i dei interaktive avstemmingane og må gje innspel via innspelskanalen. Innspelskanalen på kyrkja.no/kirkeligorganisering har vore open sidan prosjektstart, og vil vere open ei god stund til.
Innspelsmøta og innspelskanalen er ikkje siste høve til å gje tilbakemeldingar på ny organisering av kyrkja. Frå mars til september i 2021 vert saka sendt på formell høyring i heile kyrkja.